Да юбілею ў чытальнай зале рэдкіх кніг і рукапісаў ЦНБ экспануецца тэматычная выстава "Крыніца мудрасці, ведаў і навукі”. Экспазіцыю складаюць выданні з фонду аддзела рэдкіх кніг і рукапісаў ЦНБ НАН Беларусі: кірылічныя кнігі XVI-XVIII стагоддзя, выдадзеныя на тэрыторыі Беларусі, Расіі і Украіны, заходнееўрапейскія выданні гэтага ж перыяду, рускія кнігі грамадзянскага друку (XVIII ст.), бібліяфільскія выданні, беларускія кнігі 1920-1930-х гадоў. Прадстаўлены на выставе і рукапісныя дакументы.
Многія экспанаты выставы па праве лічацца жамчужынамі фонду бібліятэкі. Сярод іх- інкунабула Вільгельма Дурандуса “Агляд боскіх службаў” 1484 года выдання, “Евангелле вучыцельнае”, выдадзенае ў 1569 годе ў Заблудаве першадрукарамі Іванам Фёдаравым і Пятром Мсціслаўцам, рэдкія асобнікі кніг антычных аўтараў, якія ўваходзілі ў склад бібліятэкі Радзівілаў, унікальныя дакументы з асабістага архіва знакамітага мастака Язэпа Драздовіча і іншыя
Уваход вольны па папярэднім запісе.
18 лютага ў вялікай канферэнц-зале Прэзідыума НАН Беларусі адбудзецца пашыранае пасяджэнне Вучонага савета з удзелам членаў Прэзідыума Нацыянальнай акадэміі навук Беларусі, работнікаў Міністэрства культуры, замежных гасцей, прадстаўнікоў вядучых бібліятэк, музеяў і выдавецтваў.
Для гасцей урачыстага мерапрыемства будуць падрыхтаваны дзве выставы. Першая прадставіць навуковыя выданні ЦНБ НАН Беларусі за апошнія пяць гадоў. Другая выстава “Paradigmshift: кніга як фактар змены навуковых парадыгмаў у еўрапейскай навуцы” засяродзіць увагу наведвальнікаў на навуковых выданнях па прыродазнўчых навуках XVII-XIX стагоддзяў, якія выйшлі на тэрыторыі Рэчы Паспалітай, Расійскай Імперыі, дзяржаў Заходняй Еўропы. Будуць прадстаўлены “Скарачэнне каперніканскай астраноміі ...” Іагана Кеплера 1635 г., “Вялікае мастацтва артылерыі” Казіміра Семяновіча 1676 г., “фізіянамічныя фрагменты” Іагана Каспара Лафатэра 1775 г., “Каталог раслін ...” Пятра Сымона Палласа 1781 г. і многія іншыя.
З найбольш значнымі выданнямі бібліятэкі за ўвесь перыяд яе існавання можна будзе азнаёміцца на выставе "Цэнтральная навуковая бібліятэка імя Якуба Коласа НАН Беларусі ў публікацыях і дакументах (1925-2019)”. Экспазіцыя прадстаўлена ў холе ЦНБ НАН Беларусі.
Крыніца - «Звязда».